Seminarning birinchi kunida Butunjahon antidoping Kodeksidagi sport federatsiya (assotsiatsiya)larining roli va majburiyatlari, antidoping qoidabuzarlik turlari, doping test topshirish jarayoni, sportchi yoki vakilning huquq va majburiyatlari hamda Butunjahon antidoping agentligining ADEL platformasi va O‘zbekiston Milliy antidoping agentligi tomonidan ishga tushirilgan talim-uznada.uz platformalaridan foydalanish bo‘yicha maʼlumotlar berildi.

O‘quv-seminar dasturiga muvofiq, ikkinchi va uchinchi kunlari ADAMS tizimidan foydalanish, yuzaga kelishi mumkin bo‘lgan xatoliklar va talab etiladigan maʼlumotlar, Natijalarni boshqarish jarayonidagi murabbiy yoki boshqa shaxs tomonidan sodir etiladigan kamchiliklar va xatoliklar, Taʼqiqlangan ro‘yxat bilan ishlash bo‘yicha ko‘nikmalar shuningdek, Agentlik tomonidan ishga tushirilgan  dori-uznada.uz platformasi hamda terapevtik istisnolar arizasini qanday tartibda to‘ldirish va murojat qilish bo‘yicha ko‘nikma va maʼlumotlar berish bo‘yicha maʼruzalar qilindi.

Seminarda 30 ga yaqin federatsiya va assotsiatsiyalarning antidoping bo‘yicha masʼul xodimlari ishtirok etishdi. Seminar davomida ishtirokchilar o‘zlarini qiziqtirgan savollar bilan mutaxassislarga yuzlanishdi va kerakli javoblar olishdi. Shuningdek, seminar yakuni bo‘yicha federatsiya va assotsiatsiya masʼul xodimlariga sertifikatlar taqdim etildi.