“Play True” (Halol o‘ynash, toza o‘ynash) tadbiri, Butunjahon antidoping agentligi (WADA) tomonidan har yili o‘tkaziladigan global tadbirdir. U sportda dopingni oldini olish va halol sportni targ‘ib qilishga qaratilgan. WADA 1999-yilda tashkil topganidan buyon, dopingga qarshi kurashda oldinga siljish uchun bir qancha global tashabbuslarni amalga oshirgan, ulardan biri ham aynan “Play True” ommaviy tadbiridir.

"Play True" dasturi 2010 yillarda kengroq eʼtibor qozona boshladi. Tadbirni boshlashning asosiy sababi, dopingning sportdagi salbiy taʼsirini kamaytirish va sportchilarni halol va adolatli o‘ynashga undash edi. WADA, bu tadbir orqali nafaqat sportchilarga, balki jamiyatga ham dopingning xavf-xatarlarini tushuntirishni maqsad qilgan.

Ushbu tadbirni har yili o‘tkazilishidan asosiy maqsad – sportchilar natijaga erishish uchun doping qo‘llamaslikni targ‘ib qilish, dopingni sportdagi asosiy tahdidlardan biri sifatida tan olish va barcha darajadagi sportchilarga dopingsiz faoliyat yuritishni o‘rgatishdir. Tadbirda qatnashish orqali sportchilar o‘zlarining halolligini namoyish etishadi.

"Play True" tadbiri har yilning har xil vaqtlarida butun dunyo bo‘ylab turli yo‘nalishlar bo‘yicha o‘tkaziladi.

Maʼlumot tarqatish va taʼlim: WADA va uning hamkorlari sportchilarga dopingning zararli taʼsiri haqida taʼlim beradi, dopingga qarshi turli aksiya va seminarlarga taklif etadi.

Global onlayn tadbirlar va forumlar: Sportchilar, murabbiylar va boshqa jamoat aʼzolari bilan muloqot o‘rnatilib, dopingga qarshi kurashning samarali usullari muhokama qilinadi.

Siyosiy va ijtimoiy hamkorlik: mamlakatlar xalqaro tashkilotlar, davlatlar va sport federatsiyalari bilan hamkorlikda dopingga qarshi kurashda yangi qadamlar qo‘yiladi.

Tadbirning taʼsiri: "Play True " tadbiri nafaqat sportchilar, balki umumiy jamoatchilik uchun ham katta taʼsir ko‘rsatdi. Bu tadbir orqali:

Dopingni oldini olishda sezilarli o‘zgarishlar kuzatildi. Xususan, baʼzi rivojlanayotgan mamlakatlarda dopingga qarshi kurashda sezilarli rivojlanish yuz berdi.

Sportda adolatni taʼminlashga yordam berdi. Sportchilar doping ishlatmasdan o‘z mahoratini namoyish etishga intilishdi va shu orqali sportga bo‘lgan ishonchni oshirdi.

Xulosa o‘rnida aytish mumkinki "Play True" tadbiri butun dunyo bo‘ylab dopingga qarshi kurashning samarali vositasi sifatida tanilgan. U sportchilarni faqatgina o‘z kuchi bilan g‘alaba qozonishga chaqiradi va halol sportni targ‘ib qiladi. Mazkur globallikka erishayotgan ommaviy tadbir nafaqat dopingni aniqlash, balki sportchilarning axloqiy va ijtimoiy masʼuliyatini oshirishda ham muhim o‘rin tutadi.