Албатта, спортчиларда машғулот ҳажмининг ортиши сабабли турли хил чарчоқлар пайдо бўла бошлайди. Танага «куч» йиғиш учун эса тақиқланган моддаларни билиб ёки билмасдан истеъмол қилаётганлар ҳам учраб турибди.

Спортчилар мана шундай тақиқланган моддалардан ҳоли бўлиш ва ундай иллатлардан йироқ бўлишлари учун эса албатта мутахассисларнинг тавсиялари даркор.

Бугун доимий анъанани давом эттирган ҳолда, Ўзбекистон Миллий антидопинг агентлиги мутахассислари Ўзбекистон Регби федерациясида бўлишди ва у ерда терма жамоа спортчилари, жамоа шифокори ва мутахассислар учун «Допинг тўғрисида тушунча, допинг истеъмолининг салбий оқибатлари» мавзусида ўқув семинар ўтказишди.

Семинар давомида иштирокчилар ўзларини қизиқтирган саволлари билан мутахассисларга юзланишди ва керакли жавобларни олишди. Бундай ўқув семинарлари йил давомида турли федерация ҳамда ассоциацияларда ўтказиб келинмоқда ва бу борадаги амалий ишлар йил якунига қадар давом этади.

Алоҳида таъкидлаб ўтмоқчимиз, 2021 йил учун «Спортда қўлланилиши таъқиқланган моддалар ва услублар рўйхати» ҳам мавжуд бўлиб, мазкур рўйхат билан расмий веб-сайтимиз орқали танишиб чиқишингиз мумкин.

Эслатма! Антидопинг қоидаларини бузган спортчилар, мураббийлар, шифокорлар ва бошқа шахсий таркиб вакиллари учун жазо муқаррардир!.

ЎзМАДА

Матбуот хизмати