Пара-таэквондо бўйича аёллар ўртасида +58 кг вазн тоифасидаги ҳамюртимиз Гулжаной Наимова бироз аввал финал жангини якунлади. Олтин медаль учун кечган жангда вакилимизга бразилиялик Менезес Безерра рақиблик қилди. Қувонарлиси, ҳамюртимиз мусобақанинг иккинчи рақамли спортчисини 8:4 ҳисобида мағлубиятга учратди ва олтин медалга сазовор бўлди.

Шундай қилиб, делегациямиз ҳисобидаги медаллар сони 19 тага етди. Вакилларимиз 8 та олтин, 5 та кумуш ва 6 та бронза медали билан умумжамоа ҳисобида ҳозирча 16 ўринни эгаллаб турибди.

Бир сўз билан айтганда паралимпиячиларимиз яхши натижа қайд этишди десак муболаға бўлмайди. Тўғри, Рио-2016 Паралимпия ўйинларига қараганда кумуш ва бронза медалларини жамғариш бўйича бироз пастроқ натижа, аммо, барчамиз гувоҳи бўлдик, матонатли спортчиларимиз борларини бериб ҳаракат қилишди.

Маълумот учун айтиб ўтмоқчимиз делегациямиз вакиллари 6 сентябрь куни юртимизга қайтиб келишади.

Ташаккур юксак иқтидор эгалари, матонат соҳиблари!