Ўз навбатида Ўзбекистон Республикаси Вазирлар Маҳкамаси ҳузуридаги Миллий антидопинг агентлиги томонидан ҳам мазкур спорт тури ривожи йўлида бир қатор ишлар амалга оширилмоқда. Куни кеча Ўзбекистон Миллий антидопинг агентлиги Антидопинг таълим дастурлари бўлими бошлиғи З. Газиева ва бош мутахассис Л.Эгамбердиевалар томонидан Ўзбекистон  йилқичилик ва от спорти федерацияси спорт мураббийлари, чавандоз-спортчилар, спорт шифокорлари учун “Допинг ҳақида тушунча. Допинг тарихи” мавзусида ўқув-семинар ўтказилди.

Спортчи-чавандозларнинг мусобақаларда шаффоф ва соф ғалабалари сари тайёргарлик даврида ўтказилгани бу тадбир уларни янада соғлом бўлиб, турли ножўя иллатларга, асоратларга олиб келадиган допингга қарши курашишларига асос бўлади. Семинар иштирокчилари допинг сўзининг маъноси, унинг организмга салбий таъсири ва оқибатлари ҳақида тўлиқ маълумотларга эга бўлишди.

Шу билан бирга, допинг - спортда рақобатбардош спортчиларнинг спорт кўрсаткичларини оширувчи, тананинг жисмоний ёки психологик фаоллигини вақтинча оширувчи, ноқонуний дори воситаларини қўллаш, организмга ножўя таъсир кўрсатадиган ва махсус аниқлаш усуллари мавжуд бўлган биологик фаол моддалар, спорт кўрсаткичларини мажбурий ошириш усуллари ва кўп сонли дори-дармонлар машғулот ёки мусобақа пайтида спортчилар учун таъқиқланган мақомига эга эканлиги тушунтирилди.

Иштирокчиларнинг допинг бўйича ва семинар юзасидан билимлари тест саволларига жавоб белгилаш билан аниқланди. Семинар якунида Агентлик ходимлари спорт мураббийлари, спортчи-чавандозлар ва спорт шифокори томонидан берилган саволларга жавоблар беришди.