O‘z navbatida O‘zbekiston Respublikasi Vazirlar Mahkamasi huzuridagi Milliy antidoping agentligi tomonidan ham mazkur sport turi rivoji yo‘lida bir qator ishlar amalga oshirilmoqda. Kuni kecha O‘zbekiston Milliy antidoping agentligi Antidoping taʼlim dasturlari bo‘limi boshlig‘i Z.Gaziyeva va bosh mutaxassis L.Egamberdiyevalar tomonidan O‘zbekiston  yilqichilik va ot sporti federatsiyasi sport murabbiylari, chavandoz-sportchilar, sport shifokorlari uchun “Doping haqida tushuncha. Doping tarixi” mavzusida o‘quv-seminar o‘tkazildi.

Sportchi-chavandozlarning musobaqalarda shaffof va sof g‘alabalari sari tayyorgarlik davrida o‘tkazilgani bu tadbir ularni yana-da sog‘lom bo‘lib, turli nojo‘ya illatlarga, asoratlarga olib keladigan dopingga qarshi kurashishlariga asos bo‘ladi. Seminar ishtirokchilari doping so‘zining maʼnosi, uning organizmga salbiy taʼsiri va oqibatlari haqida to‘liq maʼlumotlarga ega bo‘lishdi.

Shu bilan birga, doping - sportda raqobatbardosh sportchilarning sport ko‘rsatkichlarini oshiruvchi, tananing jismoniy yoki psixologik faolligini vaqtincha oshiruvchi, noqonuniy dori vositalarini qo‘llash, organizmga nojo‘ya taʼsir ko‘rsatadigan va maxsus aniqlash usullari mavjud bo‘lgan biologik faol moddalar, sport ko‘rsatkichlarini majburiy oshirish usullari va ko‘p sonli dori-darmonlar mashg‘ulot yoki musobaqa paytida sportchilar uchun taʼqiqlangan maqomiga ega ekanligi tushuntirildi.

Ishtirokchilarning doping bo‘yicha va seminar yuzasidan bilimlari test savollariga javob belgilash bilan aniqlandi. Seminar yakunida Agentlik xodimlari sport murabbiylari, sportchi-chavandozlar va sport shifokori tomonidan berilgan savollarga javoblar berishdi.