Мамлакат келажаги ҳисобланган ёшларни ҳар тарафлама соғлом ва баркамол бўлиб етишишлари, келажакда юрт байроғини юксакларга кўтарадиган авлодни тарбиялаш бизнинг асосий вазифамиз ҳисобланади.

Ўзбекистон Республикаси Вазирлар Маҳкамаси ҳузуридаги Миллий антидопинг агентлиги ходимлари ёш спортчиларни ҳалол спорт рухида тарбиялаш, уларга допинг ҳақида тушунчалар бериш мақсадида ҳозирда водий бўйлаб хизмат сафарида бўлиб турибди.

Куни кеча Фарғона Олимпия захиралари коллежи спортчи ўқувчилари учун “Допинг тарихи, унинг организмга таъсири ва асорати. Антидопинг қоидабузарликлар турлари” мавзуларида ўқув-семинар ўтказилди. Спортчи ёшларга тўлиқ маълумотлар берилди ва уларни қизиқтирган саволларига тегишли жавоблар берилди. Семинар давомида иштирокчиларга махсус антидопинг тестлари тарқатилди ва юқори натижаларни қайд этган спортчилар сертификатлар билан тақдирланишди.

Шунингдек, куннинг иккинчи қисмида эса мазкур спорт таълим муассасасида фаолият олиб бораётган мураббийлар ва спорт шифокорлари  учун “Спортчи ва мураббийнинг мажбуриятлари. Антидопинг қоидабузарлик турлари” мавзуларида семинар ўтказилди.

Бундай семинарларни ўтказишдан кўзланган асосий мақсад  спортчиларни турли ножўя иллатларга, асоратларга олиб келадиган допингга қарши курашишларига асос бўлади. Семинар якунида спортчилар ўзларини қизиқтирган саволлар билан мурожаат қилишди ва керакли тавсияларни олишди.