Мамлакатимизда фаолият олиб бораётган спорт федерация ва ассоциация спортчилари ва мураббийлари учун режага мувофиқ антидопинг ўқув-семинарлари ўтказиб келинмоқда. 
Агентликнинг Антидопинг таълим дастурлари бўлими бошлиғи  доцент З.Ю.Газиева томонидан яқиндагина Хива шаҳрида бўлиб ўтган мамлакат биринчилигида саралаб олинган оғир атлетика бўйича ўсмирлар терма жамоаси аъзоларига «Антидопинг қоидабузарлик турлари» мавзусида ўқув-семинар ўтказилди. 
Ўз таркибига янги иқтидор эгаларини қўшиб олган терма жамоа мураббийлари катта мусобақалар олдидан спортчиларга допинг тушунчасини чуқурроқ сингдириш мақсадида таклиф қилишди. Сабаби бу терма жамоа спортчилари яқин келажакда мамлакат шарафини халқаро мусобақаларда ҳимоя қиладиган атлетлар саналади. 
Шундай экан, ҳозирдан бу полвонларга жисмоний машқлар билан биргаликда допинг ҳақида назарий билимларини ҳам ошириш талаб этилади. Бу борада эса Ўзбекистон Миллий антидопинг агентлиги барча федерация ва ассоциациялар билан ҳамкорликда ўқув-семинарларини ўтказишга доимо тайёр!