Ўзбекистон Республикаси Президентининг 2021 йил 5 ноябрдаги ПҚ-5280-сон қарорининг 2-иловаси билан тасдиқланган Спорт-таълим муассасалари фаолиятини 2025 йилгача ривожлантириш дастурини 2021-2022 йилларда амалга ошириш бўйича «Йўл харитаси» тасдиқланган бўлиб, масъул ташкилотлар Ўзбекистон Миллий антидопинг агентлиги ҳамда Спортни ривожлантириш вазирлиги мутасадди ходимлари вилоятларга борган ҳолда ўрганиш ишларини олиб боришмоқда.

Жумладан, Ўзбекистон Миллий антидопинг агентлиги бош директори А.Садиков, Спортни ривожлантириш вазирлиги мутахассиси У.Жўраев, Агентлик бўлим бошлиғи С.Турсунова ва Ф.Абдурашидовалар дастлаб, Фарғона вилоятига ташриф буюришди. Шундан сўнг, Андижон ва Наманган вилоятларида бўлишди.

Мутасаддилар вилоятлардаги спорт таълим муассасаларида спортчиларга яратиб берилган шароитлар билан танишиш билан бир қаторда спортчилар, спорт шифокорлари ва мураббийларга допинг истеъмол қилишнинг инсон саломатлигига таъсири юзасидан тушунтириш ишларини олиб боришди ва ўқув-семинар ўтказишди.

Вилоятга ташрифдан кўзланган мақсад ҳудудларда спортга берилаётган эътибор қай даражада эканлигини билиш, мавжуд камчиликларни ўз вақтида бартараф этиш ҳамда антидопинг соҳасидаги билимларини мустаҳкамлашдан иборатдир.

Бундай ўқув-семинарлар ва ўрганиш ишлари республика бўйлаб, режа асосида ўтказиб келинмоқда.