Qaror ijrosini taʼminlash maqsadida O‘zbekiston Milliy antidoping agentligi O‘zbekiston davlat jismoniy tarbiya va sport universiteti bilan uzoqqa mo‘ljallangan hamkorlik memorandumini imzoladi.

Memorandum doirasida uzoq muddatli, samarali va o‘zaro manfaatli hamkorlikni rivojlantirish, antidoping taʼlimoti sohasida keng maʼlumotlar almashishni joriy qilish, shuningdek, o‘quv va uslubiy faoliyat samaradorligini oshirish, sportchi va trenerlarning antidoping taʼlimoti bo‘yicha bilim va salohiyatini oshirishdir. Bundan tashqari universitetda taʼlim olayotgan magistrlarga antidoping sohasiga oid qo‘shma tadbirlar va loyihalarni ilgari surish, amalga oshirishda ko‘maklashish hamda o‘zaro hamkorlik qilish, antidoping taʼlimoti sohasida keng maʼlumotlar almashishni yo‘lga qo‘yish hamda o‘quv va uslubiy faoliyatning samaradorligini oshirish belgilangan.

Qolaversa, tomonlar, jismoniy tarbiya va sport hamda antidoping sohasida amalga oshirilayotgan ishlarni o‘rganish, mavjud dolzarb muammoli mavzular bo‘yicha ilmiy maqolalar, monografiyalar tayyorlash va nashr etish, seminarlar, respublika miqyosdagi konferensiyalar tashkil etish, Agentlik tomonidan ishlab chiqilgan elektron platformalar va o‘quv-uslubiy adabiyotlarni o‘quv jarayonlariga tatbiq qilish, Agentlik bilan kelishgan holda Agentlik tizimida faoliyat olib borayotgan yuqori malakali xodimlarni universitetning o‘quv jarayonlariga jalb qilish, malakali kadrlarni tayyorlash borasida xorijiy antidoping agentliklarining tajribasini o‘rganish maqsad qilib qo‘yilgan.

Ushbu memorandumdan ko‘zlangan maqsadlarga erishishga qaratilgan qo‘shma chora-tadbirlar va dasturlar ham ishlab chiqiladi.