Xitoy, Meksika va Gvatemala davlatlarida go‘sht va go‘sht mahsulotlari tarkibida klenbuterol moddasi mavjud bo‘lishi ehtimoli tufayli, mazkur mamlakatlarda bo‘lib qaytgan sportchilardan olingan doping sinamalarda ushbu moddaning aniqlanishi holatlari kuzatilishi mumkin. Agar sportchi topshirgan doping sinamasida klenbuterol moddasiga nisbatan ijobiy natija aniqlansa, ushbu holat yuzasidan quyidagi maʼlumotlar aniqlashtirilishi zarur:

·         Sportchi yaqin vaqt ichida Xitoy, Meksika yoki Gvatemala davlatlarida bo‘lgan-bo‘lmagani;

·         Ushbu davlatlarda bo‘lgan taqdirda, sportchi go‘sht isteʼmol qilgan yoki qilmagani, agar qilgan bo‘lsa:

o    Isteʼmol qilingan go‘shtning turi (masalan, mol, qo‘y va h.k.);

o    Go‘sht qachon, qayerda va qanday miqdorda isteʼmol qilingani.

Shuningdek, sportchining yaqinda topshirgan boshqa doping sinamalari ham ko‘rib chiqilishi lozim. Agar ushbu sinamalarda klenbuterol moddasi aniqlanmagan bo‘lsa, va faqatgina yuqorida qayd etilgan mamlakatlarda bo‘lib, u yerda go‘sht isteʼmol qilinganidan so‘ng mazkur modda aniqlangan bo‘lsa, sportchi mazkur holatning aynan klenbuterol bilan ifloslangan go‘shtni isteʼmol qilish oqibati ekanini dalillar bilan isbotlab berishi shart bo‘ladi.

Agar sportchi bunday dalillarni taqdim etolmasa, ushbu holat antidoping qoidabuzarligi sifatida baholanadi va tegishli sanksiyalar qo‘llaniladi.

Shu munosabat bilan, sportchilar va jamoa mutaxassislariga mazkur mamlakatlarga o‘quv-yig‘in mashg‘ulotlari, musobaqalar va boshqa tadbirlar uchun boradigan sportchilardan ovqat isteʼmoliga alohida eʼtibor qaratish, go‘shtli mahsulotlardan ehtiyot bo‘lish tavsiya etiladi.

Qonunchilikka muvofiq, agar sportchidan olingan doping sinama tahlili ushbu moddaga ijobiy chiqsa, u holda moddaning tasodifan organizmga tushganini mustaqil dalillar bilan isbotlab berish masʼuliyati sportchining zimmasida qoladi.

Eslatib o‘tamiz, klenbuterol "Sportda taqiqlangan moddalar va usullar ro‘yxati"ning S1. Anabolik agentlar guruhiga kiritilgan taqiqlangan modda hisoblanadi.

O‘zbekiston Milliy antidoping agentligi