1974 йил Халқаро олимпия қўмитаси ўзининг 75-сессиясини Австрия пойтахти Вена шаҳрида ўтказади. Сессия ишида бир қатор муҳим мавзулар муҳокамаси қаторида 1980 йилда ўтказиладиган олимпиада ўйинлари мезбони масаласи ҳам кўриб чиқилади. Ўшанда иккита номзод шаҳар бир-бири билан жиддий рақобатлашади: Москва ва Лос-Анжелес. Шу ерда ҳам «дунёнинг икки қутби» ўртасида рақобат бўлади. Овоз бериш жараёнида Москвада 39та, Лос-Анжелес эса 20та овоз олади ва шу тариқа Москва 1980 йилда олимпиада ўйинлари мезбонлигини қўлга киритади.

1974 йилда халқаро майдонда СССРнинг обрўси анча яхшиланган, мамлакат сиёсати «Ғарбдан душман ясашни» бирмунча камайтирган ва ҳатто АҚШ билан дўстона алоқаларга ўрнатилганди. Москванинг кўп овоз олиб, 1980 йилги олимпия ўйинларини ўтказиш ҳуқуқини қўлга киритишида шу омил муҳим роль ўйнаган бўлса ҳам ажаб эмас.

Ўша кезларда ёзги олимпиада ўйинларини ўтказиш ҳуқуқини қўлга киритиш СССР учун жуда муҳим эди. Биринчидан, ёзги олимпиада ўйинлари XIX аср охиридан буён ўтказилиб келинаётган бўлса-да, ўша пайтгача СССР ёки Россия империяси ҳудудида бирорта олимпиада бўлиб ўтмаган эди. Бундан ташқари, ўша пайтгача социалистик мамлакатларнинг бирортасида олимпиада ўйинлари ўтказилмаган ва унинг капиталистик дунё билан олиб бораётган рақобатларини инобатга олсак, Москванинг олимпиада ўйинларини ўтказиш ҳуқуқини қўлга киритгани социалистлар учун ҳам жуда аҳамиятли эди.