Yangi O‘zbekistonda barcha sohalar kabi sport sohasida ham tarixiy jarayonlar bo‘lmoqda. Futbol bo‘yicha olimpiya terma jamoamiz tarixda ilk marotaba olimpiya o‘yinlarida ishtirok etish uchun litsenziyani qo‘lga kiritdi. Ayni kunlarda o‘zbek sportida yangi sahifa ochgan OTJ aʼzolari Toshkent shahrida o‘quv mashg‘ulot yig‘inini o‘tkazmoqda. Sportchilar olimpiadaga har tomonlama jismonan, psixologik jihatlarda tayyorgarlikni olib borishmoqda. Sportchilarni halol g‘alabalarni qo‘lga kiritishi uchun O‘zbekiston Milliy antidoping agentligi ham o‘z hissasini qo‘shmoqda.

Bugun Agentlik mutaxassislari futbolchilar bilan uchrashuv o‘tkazdi. Uchrashuv davomida sportchilarning huquq va majburiyatlari, doping sinama topshirish jarayonida nimalarga eʼtibor qaratish lozim ekanligi, antidoping qoidabuzarliklari bo‘yicha maʼlumotlar berildi.

O‘z navbatida Parij-2024 olimpiya o‘yinlarida mamlakatimiz sharafini himoya qiladigan barcha sportchilar bilan bir qatorda O‘zbekiston Olimpiya terma jamoasi futbolchilariga ham omad yor bo‘lishini, halol g‘alabalarni qo‘lga kiritshlarini tilab qolamiz.