O’zbekiston Respublikasi Milliy antidoping agentligi O’zbekiston Respublikasi Prezidentining 2018 yil 3 yanvardagi PQ-3457-son “O’zbekiston Respublikasi Milliy antidoping agentligi faoliyatini tashkil etish chora-tadbirlari to’g’risida”gi qarori asosida tashkil etilgan.

Mazkur qarorga ko’ra, Agentlik o’z faoliyatini sportda doping qo‘llanilishining oldini olish va dopingga qarshi kurashish sohasida yagona davlat siyosatini samarali amalga oshirish, sportda dopingga qarshi kurash to‘g‘risidagi xalqaro konvensiya, Butunjahon antidoping kodeksi va boshqa xalqaro antidoping standartlari talablariga rioya etilishini ta’minlash maqsadida, shuningdek, Butunjahon antidoping agentligining tavsiya va takliflarini inobatga olgan holda olib borishi belgilab berilgan.

Agentlik o’z faoliyatini 2018 yil 23 fevraldagi O’zbekiston Respublikasi Vazirlar Mahkamasining “O’zbekiston Respublikasi Vazirlar Mahkamasi huzuridagi Milliy antidoping agentligi to’g’risida”gi Nizomi asosida yuritadi. Ushbu Nizomda agentlikning maqomi, asosiy vazifalari, funksiyalari, huquqlari, mas’uliyati, faoliyatini tashkil etish va hisobot berish tartibi, shuningdek, Agentlik rahbarining funksional vazifalari va mas’uliyati belgilangan.

2021 yil 6 aprelda O’zbekiston Respublikasi Prezidentining PQ-5057-son “O’zbekiston Respublikasi Milliy antidoping agentligi faoliyatini yanada takomillashtirish chora-tadbirlari to’g’risida”gi qarori asosida Agentlik faoliyati yangi bosqichga olib chiqildi hamda moddiy-texnik bazasi mustahkamlandi.

O’zbekiston Respublikasi Prezidentining 2023 yil 8 mayda qabul qilingan PQ-149-son “Ma’muriy islohotlar doirasida O’zbekiston Respublikasi Milliy antidoping agentligi faoliyatini samarali tashkil qilish chora-tadbirlari to’g’risida”gi qarori Agentlik faoliyatida tub o’zgarishlarni boshlab berdi. Ushbu qaror asosida Milliy antidoping agentligi O’zbekiston Respublikasi Milliy antidoping agentligi etib qayta tashkil etildi hamda agentlikning ustuvor yo’nalishlari, tashkiliy tuzilmasi, faoliyatini transformatsiya qilish bo’yicha “Yo’l xaritasi” tasdiqlandi.

Mazkur qarorga ko’ra, quyidagilar Milliy antidoping agentligi faoliyatining ustuvor yo‘nalishlari etib belgilangan:

1. a) sportda doping qo‘llanishining oldini olish va dopingga qarshi kurashish sohasida yagona davlat siyosatini amalga oshirish;
2. b) Butunjahon antidoping kodeksi va xalqaro antidoping standartlari asosida milliy antidoping qoidalari hamda sohani tartibga soluvchi normativ-huquqiy hujjatlar loyihalarini ishlab chiqish va uni takomillashtirish bo‘yicha takliflar berish;
3. v) olimpiya va noolimpiya sport turlari bo‘yicha sportchilardan muntazam ravishda doping-sinamalarni olish va tekshirib borish;
4. g) antidoping nazoratining samarali tizimini qo‘llagan holda farmakologik ta’sir ko‘rsatuvchi dorivor vositalar va boshqa moddalarning sportda qo‘llanishini nazorat qilish;
5. d) doping-sinamalar va doping nazoratining boshqa elementlarini tashkil etish, mamlakat sportchilari haqida ma’lumotlarni to‘plash va saqlash uchun mo‘ljallangan antidoping ma’muriyatchiligi va menejment (ADAMS tizimi) bo‘yicha onlayn tizimni qo‘llash;
6. e) antidoping nazorati sohasida ilg‘or uslublar va texnologiyalarni o‘zaro almashish hamda ularni joriy qilish uchun yetakchi xorijiy tashkilotlar bilan xalqaro hamkorlikni kengaytirish va mustahkamlash;
7. j) sport federatsiyalari, klublari va jamoalari tibbiyot xodimlarining malakasini oshirishga ko‘maklashish, ularga sportda doping qo‘llanishining oldini olish va antidoping nazoratini amalga oshirish borasida uslubiy yordam ko‘rsatish, ta’lim dasturlarini realizatsiya qilish, sog‘lom va halol sportni targ‘ib qilish;
8. z) jismoniy tarbiya-sport tashkilotlari, davlat organlari va boshqa tashkilotlarning antidoping nazorati sohasida o‘zaro hamkorligini muvofiqlashtirish.