Qayd etilishicha, xorijiy milliy jamoalardan birining aʼzosi topshirgan test natijasi musbat chiqqan. Uning shaxsiga oid maʼlumotlar oshkor qilinmayapti. “Tokio-2020” tashkiliy qo‘mitasi bosh kotibi Tosiro Mutoning so‘zlariga ko‘ra, koronavirus har kunlik test natijasida aniqlangan.

Avvalroq Yaponiyaga kelgan jamoalar sportchilari va aʼzolarida koronavirus aniqlangan, ammo bu holatlar aeroportda yoki jamoalarning dastlabki joylashgan mehmonxonalarida qayd etilgandi. Bevosita Olimpiya qishlog‘ida kasallik aniqlanishi ilk marta yuz bermoqda.

Hozirga qadar Isroil, Uganda va Serbiya sportchilarida hamda Nigeriya va Rossiya milliy jamoalariga yordamlashuvchi shaxslarda koronavirus aniqlangandi.

Avvalroq, epidemiologik vaziyat yana-da keskinlashgani sababli Yaponiyada favqulodda vaziyat muddati 2 oyga uzaytirilgandi. Olimpiya o‘yinlari tashkilotchilari musobaqani tomoshabinlarsiz o‘tkazishga qaror qilishgandi.

Eslatib o‘tamiz Olimpiada o‘yinlari 23 iyuldan 8 avgustgacha bo‘lib o‘tadi.