Mazkur nufuzli musobaqada o‘zbekistonlik paralimpiyachilar ham medallar uchun kurash olib bormoqda va bugun vakillarimizdan para suzish bo‘yicha Islam Aslanov 100 metr masofaga batterflyay usulida suzish bo‘yicha erkaklar o‘rtasida 3 o‘rinni egalladi va delegatsiyamizga dastlabki medalni olib berdi. Birinchi kundan medal qo‘lga kiritilishi ertaga startga chiqadigan sportchilarimiz uchun o‘ziga xos g‘alabaga undadi desak mubolag‘a bo‘lmaydi.

Musobaqalar qizg‘in pallaga kirib borayotgan bir vaqtda, Tokio 2020 Paralimpiya o‘yinlari dasturidan o‘rin olgan paralimpiya sport delegatsiyalarining bosh shifokorlari uchun amaliy anjuman va texnik yig‘ilish ham bo‘lib o‘tdi.

Unda O‘zbekiston paralimpiya delegatsiyasi bosh shifokori Nodirjon Tursunov ishtirok etdi. Pandemiyani inobatga olib, onlayn tashkil etilgan anjumanda zamonaviy paralimpiya sport tibbiyotining dolzarb masalalari yuzasidan fikr almashinildi. Jumladan, bu boradagi Rio-2016 Paralimpiya o‘yinlarida kuzatilgan va qayd etilgan sportchilarning kasalliklari, jarohatlari va patologik holatlari to‘g‘risida fikr yuritildi hamda taqdimotlar namoyish etildi.

Ushbu anjumanda 150 dan ortiq delegatsiya bosh shifokorlari va tibbiy xodimlar ishtirok etishdi. Anjumanning ikkinchi qismi Paralimpiada musobaqalarini texnik nuqtai-nazaridan tashkil etish masalalariga bag‘ishlandi. Unda eng yirik va sportchilar soniga ko‘ra odatdagiday ishtirokchilari ko‘p bo‘lgan para yengil atletika musobaqalarini tashkil etish, ularda tibbiy yordam ko‘rsatish va boshqa tashkiliy masasalalar muhokama qilindi.

Paralimpiya o‘yinlari boshlanishidan avval sport delegatsiyalari aʼzolaridan Paralimpiada tashkiliy qo‘mitasi tomonidan doping testlarni olish yo‘lga qo‘yilgan. O‘zbekiston paralimpiya terma jamoasining aʼzolari Tokioga yetib borishi bilan 19 ta doping-sinama topshirishdi, ulardan 22 avgust kuni 7 ta, 23 avgust kuni 9 ta va 24 avgust kuni 3 ta. Musobaqalardan oldin doping-sinamalarni topshirishdan ko‘zlangan asosiy maqsad Tokio-2020 Paralimpiya o‘yinlari oldidan doping isteʼmol qilgan sportchilarni musobaqalarga qo‘ymaslik hamda bu orqali halol raqobat va adolatli sport tamoyillarini taʼminlashdir.

“Bizning paralimpiyachilarimiz topshirgan barcha 19 ta doping-sinamalar doping nuqtai-nazaridan toza bo‘lib, ularning birontasida ham sportda taqiqlangan moddalar aniqlamadi. Yaʼni, O‘zbekiston paralimpiyachilari yuksak natijalar va sof g‘alabalarga erishish uchun faqat o‘zlarining imkoniyati va kuchi, irodasi, matonatiga ishonishadi. Biz esa ularga ishonamiz va omad tilaymiz!”, - dedi O‘zbekiston Paralimpiya delegatsiyasi bosh shifokori Nodirjon Tursunov.

Milliy antidoping agentligi

Matbuot xizmati