Butunjahon antidoping agentligi hamda Xalqaro kurash sport turlari uyushmasining xabariga ko‘ra, o‘zbekistonlik kurashchi Madina Usmonjonovaning (55kg) doping-sinamalaridan “furosemid” taqiqlangan moddasi aniqlandi.

Ushbu modda Taqiqlangan ro‘yxatning “S5. Peshob haydovchi moddalar va yashiruvchi agentlar” sinfiga mansub bo‘lib, odatda undan qisqa fursatda vazn yo‘qotish yoki boshqa taqiqlangan moddalarni isteʼmol qilganini yashirish maqsadida foydalaniladi.

Shuni taʼkidlash joizki, "furosemid" moddasi m.Usmonjonovada ikki marta – 2021 yil 15 aprelda Qozog‘istonning Olmaota shahrida bo‘lib o‘tgan ayollar kurashi bo‘yicha Osiyo chempionatida hamda 2021 yil 21 avgust kuni o‘quv-mashg‘ulot yig‘inida olingan doping-testlar tarkibida mavjudligi aniqlangan.

Hozirda Xalqaro kurash sport turlari uyushmasining antidoping xizmati tomonidan ushbu holat yuzasidan tekshiruv va o‘rganish ishlari boshlangan. Tekshiruv yakuniga yetgach sportchiga qanday chora ko‘rilishi bo‘yicha xabar beriladi.

Milliy antidoping agentligi

Matbuot xizmati