Agentlik yangiliklari
Agentlik yangiliklari
World Triathlon doping sababli Rossiya triatlon federatsiyasiga qarshi sanksiyalar kiritdi
Maʼlumki, Butunjahon antidoping kodeksining yangilangan 2021 yil tahririda sport turlari bo‘yicha Xalqaro federatsiyalarining antidoping qoidabuzarliklariga yo‘l qo‘ygan o‘sha sport turlari bo‘yicha davlatlardagi milliy federatsiyalariga nisbatan nazorat funksiyalari, masʼuliyati va majburiy javobgarlikka tortish mexanizmi joriy etilgan.
Bu normani Xalqaro triatlon federatsiyasi (World Triathlon) Rossiya triatlon federatsiyasiga tegishli sportchilar bilan bog‘liq doping holatlari ko‘p uchrayotgani sababli qo‘llashga majbur bo‘lgani taʼkidlanmoqda.
Sanksiyalar bir yil muddatga berilgan va bu muddat ichida tashkilot qo‘ygan talablarining bajarilishi yuzasidan Rossiya triatlon federatsiyasi har chorakda hisobot berib turishi lozim bo‘ladi. Sanksiyalar kuchga kirgan davrda Rossiya hududida triatlon bo‘yicha bironta ham xalqaro musobaqa o‘tkazishga ruxsat berilmaydi.
Bundan tashqari, rossiyalik sport mutasaddilari triatlon bo‘yicha Yevropa yoki xalqaro tashkilotlarda lavozimga tavsiya etilmaydi. Shu vaqtgacha egallab turganlari esa lavozimdan ozod etilishlariga to‘g‘ri keladi. Shuningdek, Rossiya triatlon federatsiyasi World Triathlon ga belgilangan pul jarimasini ham 2022 yil 1 yanvarga qadar to‘lab berishi shartligi taʼkidlangan.
Milliy antidoping agentligi
Matbuot xizmati
