Mazkur yo‘nalish bo‘yicha amalga oshirilayotgan ishlar va qator masalalar yuzasidan WADA, O‘zMADA va JADA (Yaponiya milliy antidoping agentligi) ishtirokida navbatdagi onlayn uchrashuv bo‘lib o‘tdi. O‘z navbatida O‘zMADA mutaxassislari ayni kunlarda WADA ADEL Butunjahon antidoping agentligining elektron antidoping taʼlim platformasining o‘zbek tilidagi versiyasi ustidan ish boshlashgani va joriy yildanoq o‘zbekistonlik sportchilar, murabbiylar, sport tibbiyoti xodimlari hamda sport tashkilotlarining mutasaddilari ushbu platformadan onlayn foydalanish imkoniyati yaratilishi haqida bayonot berildi.

Shuni alohida taʼkidlab o‘tish joizki, hozirgi kunga kelib mazkur WADA ADEL platformasi ingliz tilidan 14 ta tilga o‘girilgan bo‘lib, Markaziy Osiyo davlatlari ichida davlat tilidagi uning versiyasi mavjud birinchi platforma, Osiyo davlatlari ichida esa - uchinchi platforma bo‘lishi kutilmoqda. Endilikda sportchilarimiz bevosita kompyuter, planshet va mobil telefon orqali istalgan vaqtida antidoping sohasida o‘z bilimlarini onlayn mustahkamlashi va ko‘plab o‘zlarini qiziqtirgan savollariga anonim tarzda batafsil javoblarni topishlari mumkin bo‘ladi.

Shuningdek, onlayn muloqotda Qozog‘iston, Qirg‘iziston, Mongoliya, Tojikiston va Turkmaniston milliy antidoping agentliklarining rahbarlari va mutaxassislari ishtirok etib, Tokio-2020 Olimpiya va Paralimpiya o‘yinlari davomida o‘tkazilgan antidoping taʼlim dasturlari tafsilotlari yuzasidan fikr almashishdi.

Maʼlumki, Tokio o‘yinlari doirasida sportchilar uchun 50 dan ortiq onlayn antidoping seminarlari hamda bevosita musobaqalar o‘tkazish joylarida 12 ta maxsus “Outreach” dasturlari o‘tkazilgan. Ularni tashkil etishda JADA va boshqa davlatlarning antidoping agentliklari mutaxassislari ham ishtirok etishdi. Jumladan, O‘zbekiston milliy paralimpiya sport delegatsiyasi tarkibiga safarbar etilgan O‘zMADA bosh direktori, xalqaro toifadagi doping-ofitser Nodirjon Tursunov ham faol ishtirok etib, o‘z tajribasi bilan o‘rtoqlashgan edi.

Milliy antidoping agentligi

Matbuot xizmati