Joriy yilda Xanchjou shahrida (Xitoy) bo‘lib o‘tadigan yozgi Osiyo va Paraosiyo o‘yinlarida O‘zbekiston sportchilarining har tomonlama tayyorligi va muvaffaqiyatli ishtirokini taʼminlash, ularda oltin, kumush va bronza medallarini qo‘lga kiritgan sportchilarni moddiy qo‘llab-quvvatlash, shuningdek, mamlakatimizda Olimpiya va Paralimpiya harakatini yana-da rivojlantirish maqsadida:

1. Osiyo o‘yinlari tashkiliy qo‘mitasining taklifiga ko‘ra Xanchjou shahrida (Xitoy) 2022-yil 10-25-sentyabr kunlari XIX yozgi Osiyo o‘yinlari hamda shu yilning 9-15-oktyabr kunlari IV yozgi Paraosiyo o‘yinlarida (keyingi o‘rinlarda – Osiyo va Paraosiyo o‘yinlari) O‘zbekiston sport delegatsiyasining ishtirok etishi rejalashtirilganligi maʼlumot uchun qabul qilinsin.

2. Quyidagilar Osiyo va Paraosiyo o‘yinlariga O‘zbekiston sportchilarini tayyorlashning ustuvor vazifalari etib belgilansin:

O‘zbekiston sport delegatsiyasining avvalgi Osiyo o‘yinlariga nisbatan sport turlari bo‘yicha 30 tadan 35 tagacha hamda Paraosiyo o‘yinlariga nisbatan parasport turlari bo‘yicha 8 tadan 13 tagacha, umumiy professional sportchilar sonini 50 foizdan oshirish;

anʼanaviy yakkakurash sport turlari bilan bir qatorda o‘q otish, yengil atletika, eshkak eshish, velosport, gandbol, regbi, basketbol 3x3, suv sporti, shuningdek, paravelosport va parashaxmat sport turlari bo‘yicha natijadorlikni oshirish;

sportchilarning genetik va fenokopik imkoniyatlarini o‘rganib, ularga ratsional ovqatlanish hamda mashg‘ulot yuklamalarini to‘g‘ri taqsimlash bo‘yicha tavsiyalar berish va ularni milliy terma jamoalarga jalb qilish, shuningdek, har bir sportchining psixologik portretini shakllantirish orqali psixologik tayyorlab borish;

sport turlari bo‘yicha tayyorgarlik jarayoniga xorijiy trenerlar va mutaxassislarni, shu jumladan, sport farmakologlari, diyetologlari, psixologlarini jalb qilish;

sportchilar uchun uzluksiz o‘quv-mashg‘ulot yig‘inlarini o‘tkazish hamda yakuniy tayyorgarlik bosqichini samarali va sifatli tashkil etish.

3. O‘zbekiston sport delegatsiyasining 2022-yilda Xanchjou shahrida (Xitoy) bo‘lib o‘tadigan XIX yozgi Osiyo va IV Paraosiyo o‘yinlariga tayyorgarlik ko‘rishi va muvaffaqiyatli ishtirok etishi bo‘yicha “yo‘l xaritasi” ilovaga muvofiq tasdiqlansin.

4. Belgilab qo‘yilsinki:

a) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilari:

oltin medal uchun – 5 000 AQSH dollari;

kumush medal uchun – 3 000 AQSH dollari;

bronza medal uchun – 2 000 AQSH dollari;

b) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilarini tayyorlagan trenerlar:

oltin medal uchun – 2 500 AQSH dollari;

kumush medal uchun – 1 500 AQSH dollari;

bronza medal uchun – 1 000 AQSH dollari;

v) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilarini tayyorlagan boshqa mutaxassislar (shifokor, diyetolog, massajist va boshqalar):

oltin medal uchun – 2 000 AQSH dollari;

kumush medal uchun – 1 000 AQSH dollari;

bronza medal uchun – 500 AQSH dollari miqdorida har bir medal uchun bir martalik pul mukofotlari bilan rag‘batlantiriladi;

g) mazkur bandda nazarda tutilgan xarajatlar Davlat byudjeti mablag‘lari hisobidan qoplanadi.

5. Belgilansinki, Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilari va ularni tayyorlagan trenerlar qo‘shimcha ravishda mahalliy byudjet mablag‘lari hisobidan quyidagi miqdorda bir martalik pul mukofotlari bilan rag‘batlantiriladi:

a) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilari:

oltin medal uchun – bazaviy hisoblash miqdorining 300 baravari miqdorida;

kumush medal uchun – bazaviy hisoblash miqdorining 200 baravari miqdorida;

bronza medal uchun – bazaviy hisoblash miqdorining 100 baravari miqdorida rag‘batlantiriladi;

b) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilarini tayyorlagan trenerlar:

oltin medal uchun bazaviy hisoblash miqdorining – 200 baravari miqdorida;

kumush medal uchun bazaviy hisoblash miqdorining – 100 baravari miqdorida;

bronza medal uchun bazaviy hisoblash miqdorining – 50 baravari miqdorida;

v) mazkur bandda nazarda tutilgan xarajatlar mahalliy byudjetning qoldiq mablag‘lari va daromadlar rejasining oshirib bajarilgan qismidan qoplanadi.

6. Quyidagilar Osiyo va Paraosiyo o‘yinlariga tayyorgarlik ko‘rishning moliyalashtirish manbalari etib belgilansin:

Sportni rivojlantirish vazirligi, O‘zbekiston Milliy olimpiya qo‘mitasi, O‘zbekiston Milliy paralimpiya qo‘mitasiga ajratilgan Davlat byudjeti mablag‘lari;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

7. 2024-yil Parij shahrida (Fransiya) bo‘lib o‘tadigan XXXIII yozgi Olimpiya va XVII Paralimpiya o‘yinlariga O‘zbekiston sportchilarini tayyorlash bo‘yicha Respublika komissiyasiga (A.N. Aripov):

ikki hafta muddatda Osiyo va Paraosiyo o‘yinlarida ishtirok etadigan O‘zbekiston sport delegatsiyasining kontingentini, shuningdek, ushbu o‘yinlarga bosqichma-bosqich tayyorgarlik olib borish sxemasini tasdiqlash;

Osiyo va Paraosiyo o‘yinlariga tayyorgarlik ko‘rish va muvaffaqiyatli ishtirok etish bo‘yicha mazkur qaror bilan tasdiqlangan “Yo‘l xaritasi”da masʼul vazirlik, idora va tashkilotlar zimmasiga yuklatilgan vazifa va topshiriqlarning o‘z vaqtida va sifatli bajarilishini nazoratga olish;

sport sohasidagi malakali mutaxassislar va masʼul sport tashkilotlari vakillaridan iborat Osiyo va Paraosiyo o‘yinlari tezkor shtablari faoliyatini tashkil etish;

Osiyo o‘yinlari dasturiga kiritilgan noolimpiya sport turlariga sport bazalarini biriktirish, sport inventarlari bilan taʼminlash, 110 kunlik uzluksiz mahalliy va xalqaro o‘quv-mashg‘ulot yig‘inlari hamda xalqaro sport musobaqalarida terma jamoa aʼzolari ishtirokini taʼminlash;

O‘zbekiston Milliy olimpiya qo‘mitasi va O‘zbekiston Milliy paralimpiya qo‘mitasi huzurida sportchilarning doping nazoratini olib borish uchun mo‘ljallangan Dopingga qarshi maʼmuriyat va boshqaruv tizimi (ADAMS) dasturi bo‘yicha maxsus ishchi guruhlarini tashkil etish;

natijadorligi past bo‘lgan sport federatsiya (assotsiatsiya)larida zamonaviy sport menejmentini yo‘lga qo‘yish.

8. Sportni rivojlantirish vazirligi (A.Ikramov), O‘zbekiston Milliy olimpiya qo‘mitasi (Sh.Tashmatov), O‘zbekiston Milliy paralimpiya qo‘mitasi (M.Tashxodjayev)ga:

sportchilarning xalqaro sport musobaqalariga tayyorgarligi davomida jismoniy va ruhiy holatini yaxshilash, jumladan, trenerlar, sport shifokorlari, hakamlar ishtirokida mahalliy va xalqaro seminar-treninglar, master-klass tadbirlarini o‘tkazib borish choralarini ko‘rish;

Osiyo va Paraosiyo o‘yinlarida O‘zbekiston sport delegatsiyasi aʼzolarining qatnashishi uchun ularni sport anjomlari, rasmiy libos va sport ekipirovkasi bilan taʼminlash;

Madaniyat vazirligi, Tashqi ishlar vazirligi, Toshkent shahar hokimligi bilan birgalikda Osiyo va Paraosiyo o‘yinlarida O‘zbekiston sport delegatsiyasi aʼzolarini tantanali kuzatish va kutib olish tadbirlarini yuqori saviyada tashkillashtirish vazifasi yuklatilsin.

9. O‘zbekiston Milliy olimpiya qo‘mitasi (Sh.Tashmatov), Sog‘liqni saqlash vazirligi (B.Musayev) milliy terma jamoa aʼzolariga sifatli tibbiy xizmat ko‘rsatish, ularning jismoniy holatini yaxshilash maqsadida:

O‘zbekiston Milliy olimpiya qo‘mitasi huzuridagi Respublika sport tibbiyoti ilmiy-amaliy markazi (keyingi o‘rinlarda – Markaz) faoliyatini yana-da takomillashtirish;

sportchilarning o‘quv-yig‘in mashg‘ulotlari va musobaqalar davrida jismoniy holatini tibbiy ko‘rikdan o‘tkazishga mo‘ljallangan mobil laboratoriyalar faoliyatini tashkillashtirish va ularni zarur jihozlar bilan taʼminlash;

sport turlari bo‘yicha terma jamoalarga tibbiyot xodimlarini Markaz orqali biriktirish va jalb etish tizimini yo‘lga qo‘yish;

Markaz ish faoliyati unumdorligini oshirish maqsadida mahalliy va xorijiy mutaxassislar bilan hamkorlikni yo‘lga qo‘yish choralarini ko‘rsin.

10. Belgilansinki:

Markaz faoliyatini yaxshilash maqsadida NexION 1 000 (master-spektro-metr Perkin Elmer) va mobil kriokamera tibbiy asbob-uskunalarni xarid qilish uchun 2022-yilda faoliyati tugatilgan “Sog‘lom turmush tarzi” platformasiga ajratilgan mablag‘lar doirasida 5 milliard so‘m yo‘naltiriladi va 2023-yilda ko‘chma laborator tahlillarni o‘tkazish maqsadida 1 dona avtobus xarid qilish uchun Davlat byudjeti parametrlarida zarur mablag‘lar ko‘zda tutiladi;

Markaz uchun talab etiladigan boshqa tibbiyot jihozlari va asbob-uskunalarni xarid qilish Markazning o‘z mablag‘lari hisobidan amalga oshiriladi.

11. Oliy va o‘rta maxsus taʼlim vazirligi (A.Toshqulov), Xalq taʼlimi vazirligi (B.Saidov), Mudofaa vazirligi (B.Qurbonov), Milliy gvardiya (R.Djurayev) Bandlik va mehnat munosabatlari vazirligi (N.Xusanov) bilan birgalikda Osiyo va Paraosiyo o‘yinlariga tayyorgarlik ko‘rayotgan sportchilar, trenerlar va boshqa mutaxassislarning tashkil etiladigan sport musobaqalari, o‘quv-mashg‘ulot yig‘inlari davrida taʼlim muassasasi o‘quv darslaridan, ish faoliyatidan belgilangan tartibda ozod qilinishini va sport tadbirlarida o‘z vaqtida ishtirok etishini taʼminlasin.

12. Milliy antidoping agentligi (N.Tursunov):

sportchilar tomonidan antidoping qoidalariga qatʼiy rioya qilinishi ustidan samarali nazoratni amalga oshirsin;

sport federatsiya (assotsiatsiya)lari bilan birgalikda reja-grafik asosida seminar-treninglar tashkil qilib borsin;

O‘zbekiston sport delegatsiyasi aʼzolarini antidoping mavzulariga oid tegishli o‘quv-axborot materiallari va turli ko‘rgazmali maʼlumotlar bilan taʼminlasin.

13. Tashqi ishlar vazirligi (V.Norov):

Sportni rivojlantirish vazirligi, O‘zbekiston Milliy olimpiya qo‘mitasi, O‘zbekiston Milliy paralimpiya qo‘mitasi buyurtmanomasiga muvofiq Osiyo va Paraosiyo o‘yinlariga tayyorgarlik davri mobaynida terma jamoa aʼzolari uchun xorijga chiqish hujjatlarining tezkorlik bilan rasmiylashtirilishini taʼminlasin;

O‘zbekiston sport delegatsiyasining Pekindagi “Beyjing” hamda Xanchjoudagi “Syaoshan” (Xitoy) xalqaro aeroportlarida immigratsiya nazoratidan o‘tishiga ko‘maklashsin.

14. Ichki ishlar vazirligi (P.Bobojonov):

O‘zbekiston sport delegatsiyasi aʼzolarining Osiyo va Paraosiyo o‘yinlarida qatnashishi uchun ularning xorijga chiqish biometrik pasportlari tezkorlik bilan rasmiylashtirilishini taʼminlasin;

kuzatish va kutib olish tadbirlarida xavfsizlikni taʼminlash va jamoat tartibini saqlash, shuningdek, O‘zbekiston sport delegatsiyasi transport vositalari kuzatuvini tashkil etish bo‘yicha zarur tashkiliy choralarni ko‘rsin.

15. Transport vazirligi (I.Maxkamov):

Sportni rivojlantirish vazirligi, O‘zbekiston Milliy olimpiya qo‘mitasi hamda O‘zbekiston Milliy paralimpiya qo‘mitasi talabnomalariga asosan joriy yilning sentyabr-oktyabr oylarida Xanchjou shahriga (Xitoy) reyslar tashkil etilishi, shuningdek, O‘zbekiston sport delegatsiyasi uchun aviachiptalar bron qilinishini;

“Toshkent – Xanchjou – Toshkent” yo‘nalishi bo‘yicha qo‘shimcha charter reyslari tashkil etilishi va amalga oshirilishini;

O‘zbekiston sport delegatsiyasi aʼzolariga tegishli bo‘lgan sport anjomlari va jihozlarining Islom Karimov nomidagi “Toshkent” xalqaro aeroporti orqali bepul o‘tkazilishini;

Islom Karimov nomidagi “Toshkent” xalqaro aeroportining umumiy zalida “yashil yo‘lak” tashkil qilish va mazkur yo‘lak orqali O‘zbekiston sport delegatsiyasi aʼzolarini kuzatishni va kutib olishni taʼminlasin.

16. Davlat bojxona qo‘mitasi (A.Mavlonov) O‘zbekiston sport delegatsiyasi aʼzolari va ularning qo‘l yuklarini (sport ovqatlari va boshqa oziq-ovqat mahsulotlari, sport anjomlari, jihozlar, tibbiy asbob-uskunalar va preparatlar hamda boshqalar) bojxona nazoratidan o‘tkazish va rasmiylashtirish ishlari tezkorlik bilan amalga oshirilishini taʼminlasin.

17. O‘zbekiston Milliy olimpiya qo‘mitasi (Sh.Tashmatov) hamda O‘zbekiston Milliy paralimpiya qo‘mitasi (M.Tashxodjayev) Sog‘liqni saqlash vazirligi (B.Musayev) bilan birgalikda O‘zbekiston sport delegatsiyasini zarur bo‘lgan tibbiy jihozlar, asbob-uskunalar va preparatlar bilan taʼminlasin.

18. O‘zbekiston Milliy teleradiokompaniyasi (A.Xadjayev), O‘zbekiston Milliy axborot agentligi (A.Ko‘chimov) sportchilarning tayyorgarlik jarayonlari, o‘quv-mashg‘ulot yig‘inlari hamda Osiyo va Paraosiyo o‘yinlarida bevosita ishtiroki to‘g‘risida qisqa metrajli videoroliklar hamda maxsus ko‘rsatuvlar tayyorlanishini va ommaviy axborot vositalarida doimiy ravishda keng yoritilishini taʼminlasin.

19. Sportni rivojlantirish vazirligi (A.Ikramov), O‘zbekiston Milliy olimpiya qo‘mitasi (Sh.Tashmatov), O‘zbekiston Milliy paralimpiya qo‘mitasi (M.Tashxodjayev), sport federatsiya (assotsiatsiya)lari hamda sport turlari bo‘yicha Respublika oliy sport mahorati maktablari tomonidan Osiyo va Paraosiyo o‘yinlariga tayyorgarlik ko‘rish uchun sport anjomlari, jihozlar, uskunalar, delegatsiya rasmiy liboslari, sport ekipirovkasi, sport tibbiyoti jihozlari, tibbiy-biologik preparatlarni xarid qilish, shuningdek, o‘quv-mashg‘ulot yig‘inlari bo‘lib o‘tadigan sport bazalarini taʼmirlash va rekonstruksiya qilish, yotoqxona, sport zallari va sport jihozlari ijarasi hamda ovqatlanishni tashkil qilish bilan bog‘liq tartib-taomillar qonunchilikda belgilangan tartibda davlat xaridlarining asosiy prinsiplariga rioya qilingan holda amalga oshirilsin.

20. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari:

joylarda olimpiya va paralimpiya sport turlarini rivojlantirish

va muvofiqlashtirish, uslubiy qo‘llab-quvvatlash va monitoring qilish maqsadida sport federatsiya (assotsiatsiya)lari hududiy bo‘linmalarining moliyaviy va moddiy-texnik bazasini mustahkamlasin;

tuman (shahar)larda tegishli sport turlarini rivojlantirish va ommalashtirish hamda zarur shart-sharoitlar yaratish choralarini ko‘rsin;

Osiyo va Paraosiyo o‘yinlariga tayyorgarlik ko‘rayotgan milliy terma jamoa sportchilari, trenerlari va boshqa mutaxassislarini moddiy va ijtimoiy qo‘llab-quvvatlasin, ularning maishiy sharoitlarini yaxshilash bo‘yicha masʼullarni biriktirsin;

hududiy terma jamoa sportchilari, trenerlari va boshqa sport mutaxassislarining respublika va xalqaro sport tadbirlari hamda o‘quv-mashg‘ulot yig‘inlarida uzluksiz ishtirokini taʼminlash choralarini ko‘rsin.

21. Mazkur qarorning ijrosini samarali tashkil qilishga masʼul va shaxsiy javobgar etib sportni rivojlantirish vaziri A.I.Ikramov, sportni rivojlantirish vazirining o‘rinbosari Sh.Sh.Maxmudov, O‘zbekiston Milliy olimpiya qo‘mitasi raisining o‘rinbosari Sh.R.Tashmatov va O‘zbekiston Milliy paralimpiya qo‘mitasi raisi M.M.Tashxodjayev belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish O‘zbekiston Respublikasi Bosh vaziri A.N. Aripov hamda O‘zbekiston Respublikasi Prezidentining maslahatchisi A.A. Abduvaxitov zimmasiga yuklansin.

O‘zbekiston Respublikasi

Prezidenti              Sh.MIRZIYOYEV