Agentlik yangiliklari
Agentlik yangiliklari
Qashqadaryo: tashrif yakunida viloyatdagi tuman boʻlim boshliqlari va sport taʼlim muassasalari rahbarlari ishtirokida yigʻilish oʻtkazildi
Avval xabar berganimizdek, Oʻzbekiston Milliy antidoping agentligi, Sportni rivojlantirish vazirligi, Milliy Olimpiya qoʻmitasi va Milliy paralimpiya qoʻmitalari tomonidan tasdiqlangan “2024-yil Parij shahrida (Fransiya) boʻlib oʻtadigan XXXIII yozgi Olimpiya va XVII Paralimpiya oʻyinlariga Oʻzbekiston sportchilarini tayyorlashda doping qoʻllanilishini oldini olish va dopingga qarshi kurashish boʻyicha chora-tadbirlari toʻgʻrisida”gi dastur tasdiqlangan boʻlib, mazkur dasturga asosan mutasaddilar viloyatlarda xizmat safarida boʻlib qaytishdi.
Jumladan, Oʻzbekiston Milliy antidoping agentligi bosh direktori A.Sadikov, Sportni rivojlantirish vazirligi mutaxassisi U.Joʻrayev, Agentlik boʻlim boshliqlari N.Azamatova va Sh.Mavlonovlar dastlab, Surxondaryo viloyatiga tashrif buyurishgan boʻlsa, navbatdagi manzil Qashqadaryo viloyati boʻldi.
Viloyatga tashrifdan koʻzlangan maqsad olis hududlarda sportga berilayotgan eʼtibor qay darajada ekanligini bilish, mavjud kamchiliklarni oʻz vaqtida bartaraf etish hamda antidoping sohasidagi bilimlarini mustahkamlash borasida oʻrganish ishlarini olib borishdir.
Shu maqsadda Qashqadaryodagi Gʻuzor tuman BOʻSM va Olimpiya va milliy sport turlari boʻyicha davlat ixtisoslashtirilgan maktab internati, Qarshi olimpiya va paralimpiya zaxiralari kolleji hamda Kasbi tumani BOʻSMlarda amalga oshirilayotgan ishlar bilan tanishildi.
Shuningdek, Sportni rivojlantirish vazirligi mutaxassisi U.Joʻrayev mazkur sport taʼlim muassasalarida yangi oʻquv yiliga tayyorgarlik va qabul jarayonlari bilan tanishdi. Oʻz navbatida mutasaddilarga kerakli tushuntirishlar va tavsiyalar berdi.
Qashqadaryoga tashrif yakunida viloyatdagi barcha sport taʼlim muassasasi rahbarlari va tuman boʻlim boshliqlari ishtirokida ZOOM platformasi orqali onlayn yigʻilish oʻtkazildi.
Bu kabi oʻrganish ishlarini olib borishdan koʻzlangan asosiy maqsad chekka hududlarda yechimini topmayotgan masalalarni oʻz vaqtida hal qilish va bu orqali terma jamoaga iqtidorli sportchilarni tayyorlab beradigan sport taʼlim muassasalari faoliyatini yaxshilashdan iboratdir.
