Mazkur qaror bilan kibersport turlari bo‘yicha respublika va xalqaro chempionatlar va turnirlar tashkil etish, shuningdek, nufuzli xalqaro va mintaqaviy musobaqalarda munosib ishtirok etish vazifalari belgilangan.

Shuningdek, mazkur qarorda O‘zbekiston Respublikasi Milliy antidoping agentligiga ham qator vazifalar yuklatilgan. Jumladan, “Kibersport turlarini yana-da rivojlantirish va keng ommalashtirish chora-tadbirlari dasturi”da Agentlik tomonidan kibersportda dopingga qarshi kurashish ishlarini takomillashtirish, antidoping taʼlim dasturlari va o‘quv-uslubiy adabiyotlarini ishlab chiqish hamda kibersportchilar tomonidan antidoping qoidalariga qatʼiy rioya qilinishi ustidan samarali nazoratni amalga oshirish vazifalari belgilab qo‘yilgan.

Ushbu vazifalarni samarali va o‘z vaqtida bajarish maqsadida Agentlikda mutasaddilar ishtirokida uchrashuv bo‘lib o‘tdi. Unda O‘zbekiston Milliy antidoping agentligi direktori A.Sadikov va O‘zbekiston kibersport assotsiatsiyasi rahbari D.Jo‘rayev va boshqa mutasaddi xodimlar ishtirok etishdi.

Uchrashuv davomida kibersport sohasida yangi o‘quv-uslubiy adabiyotlar yaratish va doimiy ravishda antidoping o‘quv-seminarlarini o‘tkazishga kelishib olindi.

Alohida taʼkidlab o‘tish lozim, mazkur sport turi mamlakatimizda yosh bo‘lishiga qaramay O‘zbekiston chempionati bahslari ham o‘tkazib kelinmoqda va mamlakat terma jamoasi ham shakllantirilgan bo‘lib, doimiy ravishda xalqaro musobaqalarda yakkalik va jamoaviy bahslarda ishtirok etib kelmoqda.

O‘zbekiston Milliy antidoping agentligi

Matbuot xizmati