Mamlakatimiz sport jamoatchiligi ham tarixiy natija qayd etish maqsadida bor eʼtiborini sportchilarning jismoniy va psixologik tayyorgarligiga qaratishgan. Shular bilan bir qatorda sportchilarni halol g‘alabalarni qo‘lga kiritishi uchun O‘zbekiston Milliy antidoping agentligi ham o‘z xissasini qo‘shmoqda.

Butunjahon antidoping agentligi (WADA) ning talabiga binoan Parij-2024 o‘yinlariga litsenziyani qo‘lga kiritgan sportchilarni doimiy nazoratga olish, ular bilan profilaktik suhbatlar va tushuntirish ishlarini olib borish topshirig‘i berilgan. Shu maqsadda Agentlik mutaxassislari  sportning baydarka va kanoeda eshkak eshish bo‘yicha terma jamoa aʼzolari, Parij-2024 litsenziantlari Yekaterina  Shubina, Shaxriyor Maxkamov va Nilyufar Zokirovalar hamda para baydarka kanoechilarimiz Shaxnoza Mirzayeva, Xayitmurod Sherkuziyev, Xasan Kuldoshev,  Iroda Rustamova, Shaxzoda Mamadaliyeva va Azizbek Abdulxabibovlarga antidoping qoidabuzarliklari, doping sinama topshirish jarayonida sportchining huquq va majburiyatlari bo‘yicha maʼlumotlar berib, tushuntirish ishlarini olib borishdi.

Shuningdek, WADA talabiga binoan litsenziya qo‘lga kiritgan sportchilardan musobaqalarga qadar kamida 3 marotaba doping sinama olish talabi qo‘yilgan. Bu esa sportchilar musobaqaga qadar doimiy nazoratga olinishi va o‘yinlardan so‘ng topshirgan doping sinamasida taqiqlangan moddalar aniqlanishini oldini olish uchun chora hisoblanadi.